Garibaldi

                                            Garibaldi e la fuga in bragozzo.   Gvara 2007

   Scena:  molo o riva.       Personaggi: 5 pescatori, 2 popolane.

Beppo (a PV, seduto con pipa) = Oh, seu qua, paron Vincenzo!

Paron Vincenzo = Bondì, Beppo.

B = Che buriana, l’altra note.

PV = Sì bem.

B = Ho apena finio de secare la batana.

PV = Xé sta proprio um bel temporalon de caldana.

B = Piova d’agosto rinfresca el bosco; e la stagion xé finia.

PV = Cossa distu! Xé apena el quatro del mese, gavemo ancora un bel toco       d’istae davante.

B = Savaremo cossa farsene se no se puole andare in mare.

PV = Mah, no so quanto che la puole durare.

B = Gaveu novità? Mi so che a Brondolo i austriachi ghe n’à ciapà un fraco.

PV = (ironoco) Eh, i à fato mondo …

B = Maredediana! I gaciavà ai ‘striaci duzento buò e sinquanta peote de farina, patate, vin …

PV = Ò sentio …

B = E una vandiera!

PV = Ah, co quela…! Dato che l’à l’aquila e anca co do teste … se faremo un bel brodeto …

B = Sarà sempre pì megio de gnente.

PV = Sì bem, però dopo semo tornai indrio e semo sempre serai qua dentro in laguna come mazanete in un cogolo.

B = Ma voleu che no la cambia?

PV = E come? Semo restai da soli, lo savè.

B = Sì bem, ma …

PV = I pareva tuti de acordo e, vara, dopo le prime bastonae … el papa ga ciapà paura, st’altri ghe xè andà drio e el Savogia, fantolin, à dovesto mocarsela.

B  = Come sarave? I ga portà via la cariega?

PV = No; no saveu!? A xè ndao in Portogalo e a ga lasao el posto a so fio

Vitorio Manuele.

                                                    1

B = Senti ciò.

PV = E anca el papa … (gesto ad indicare che se ne è andato)

B = Ma quelo i podeva anca lasarlo stare dove ca gera.

PV = Vaghelo a dire ai republicani.

B = Ma no i xè quei che ga copà Gesù Cristo!

PV = Vedo che ti sa mondo! I repubblicani i xè quei che vole la republica e no i re. Descantite! No ti sa che prima che venisse i todeschi…, ansi no, xè sta chel sfondron de Napolion a vendarne …                                                  

B = E alora?

PV =  Alora, prima Venesia gera una republica, e adeso la volevimu rifare e essare libari de fare i fati nostri, e a Roma i xè andai, co Garibaldi in testa, per fare la republica romana come ai tempi dei antichi romani.

B = Oh, ma sto Gariboldi, xè vero che a xè drio venire qua?

Pv = Pararave de sì. No so cossa che a vegna a fare perché oramai …

B = Oramai cossa? Dizè che no ghe pì speranse?

PV = Caro Bepo, me despiaze dilo, ma Venesia xè a fundi; i venesiani no se pole pì muovare anche se i à do teste fine che li comande; el manin e el Tomaseo cossa vuostu che i capissa de ‘provigionamenti, de biave, de strategie de guera, de rangiarse fra barene e cavane co le barche sensa farse ciapare da nissun! Bià essare mezi filibustieri e no’ solo homani de letere.  A nualtri ciosoti la ne va bem sia perché semo de manco e sia prinsipalmente perché gavemo pì posibilità de rangiarse fra mare, canai, fiumi e laguna co le nostre barche; semo zente de mare, no boteghieri. El magnare per el momento no a ne manche.

B = El tabaco, però …

PV = Co i vien da Cesenatico o da Sinigagia, i ne ne porte, quelo bom, del moro.

B =   A ben sì, quelo che vien da la Turchia …

     Donna Pasqua ( entrando con L.) = Bondì, paroni.

PV = Bondì, dona Pasqua.

B = Bondì. Che granda che s’à fato sta fia! No la xè la Lusieta?

DP = Sì bem.

Lusietta = Bondì.

DP = Brutti tempi per le zovani da mario, schei no ghe n’è e no se sa come

la vaga a finire. E quando che la vaga a finire.

B = Ma no la durarà tanto, vedarè.

                                                       2

DP = Speremo bem. Intanto anche ancuo … semo apena stae a un funerale.

L = I à dito la messa a quattro morti insieme.

DP = E ghe gera messa da morto anca a san Giacomo.

L = In cale nostra ghe ne ze za morti do.

B = Anca in cale miaò sentio che parecci i sta male. Pare che el primo morto de colera acertao sia sta una setimana fa.

DP = Sto colera va a finire che a ne cope tuti. No xè che i ne lo à portà quei soldai che xè venui da fora.

B = Eh podarave esere.

PV = Xè che semo in massa tuti strucai qua indentro.

DP = Anca massa. I dovaria tenirli pì serai sti militari foresti. Che i staga fora da Ciosa; perché … i xè de man longa e de … Lassemo perdare, che ste fantoline no puole pì fare un giro de piassa sicure.

L = Mi go za el novisso, no me ne impasso: no li vedo gnanca.

B = E chi saravelo, se posso saverlo?

L = A xè Tita Nane fio de paron Anzolo Moleto.

PV = Ah, i xe a fare la pescà ne le Romagne.

L = Sì, a dovaria fare la ciosà per l’Anunsiata.

PV = Se i ghe la fa a pasare el bloco austriaco.

DP = Ma che no la sia mai finia?!

B = E chi sa!

DP = No ghe pì niente nì per le rive nì in botega da biava; vardè: la sporta vuoda! No se trove ogio, nì farina per la polenta … No un toco de strassa per farse na sotana … niente. Anche a legna per el fuoco … Tasi che el sale se lo femo nu in casa, sinoe dovaressimo magnare i gó anca desavii.

B = Mi, se li gavesse, anca desavii me li sfondrarave.

L = Xè i mii fradei che pesche in barena.

PV = Bisogna arangiarse in qualche maniera.

DP = Mária: ma quei che bragossi xei?  (indica)

B = Tiò, varda ….

L = Da le vele … no ghe xè quelo de Tita Nane.

PV = A bonora i xè tornai; i xè de la pescà de Sinigagia.

                            [Scene e dialoghi da definire in base all’entrata scenica dei pescatori.]

B = Oh, Sante, come xela?! Gigio, semo bem?

DP = Cossa ne coonteu, creature?

L = Saveu gnente de T…

                                                       3

DP = Tasi!

PV = Così ghe l’avè fata!

Sante = Ben sì, ma la xè sta duretta.

Gigio = Fra maltempo e cruchi …

S = E el Garibaldi che supieva …

B = Chi supieva?

PV = Quando?

DP = Per cossa?

G = Ah, questa la xè propio bela da contare!

S = Sì bem, zente.

B = Cossa xè suceso?

DP = Cossa xè stao?

L = Mária …!

G = Dovè savere che gavemuno a bordo gnentemanco che Garibaldi in persona.

S = No poprio nualtri; nu gavemuno un puoco dei soi, co le bluse rosse. Elo gera sul Furioso.

G = Sì, el bragosso de paron Buricolo. E ghe gera anche so mugere.

B = E Gariboldi dove xelo adeso? Xelo qua co vu?

DP = Diseu …?

S = No, i sa arenao visin Goro, verso Magnavacca.

G = I à dovesto butarse in tera o i ustriachi li copeva tuti a canonae.

DP = Signorebenedeto!

B = Ma come xè sta?

PV = Cominciè dal prinsípio.

L = Savè niente de Tita Nane Moleto?

G = Che sapia mi, a xè restà in tera a Cesenatico. (o, in alternativa, “No a gera in mare co nu.”)

S = El do, de note, e che note, zente!

B = Anca qua do zorni fa ga fato una bela caligà.

PV = Ma no a gera a Roma el Garibaldi?

G = Sogiunumi!

S = I xè scampai; el dó de lugio. Me la contà in barca uno de lori. El papa a sa fato giutare dai francesi …

B = Distu?!

PV = Ma no i xè magnapreti?

                                                         4

S = Cossa vostu che te diga … I sarà sta pì de duzento quei de Garibaldi perché semo salpai co dodeze bragossi e na tartana. Garibaldi, co so mugere, a gera nel Furioso de paron Rico Buricolo.  [ o a chialtro attribuito]

B = E col maltempo che gera ?!

G = Nuialtri ghe l’avemo dito, ma chel mato de Garibaldi cossa falo ?! Elo, elo in prima persona a salte su una batela e a va fuora del porto per dare fundo a do feri per poder dopo tonneggiare i bragossi e farli andare fuora del porto.

S = E nualtri a dirghe che gera massa bruto, e infati la prima alzana la ghe sa roto.

G = E dopo la volesto ancora fare de testa soa: ghe disevimu:”Vardè che ghe xè le canoniere ustriache visin la costa, ciapemosela larga. Co’ nualtri stemo tacai in te la costa, no podemo montare la ponta de la Maistra e andemo in boca al lovo. Xe megio, mondo megio che nualtri se cassemo pi’ ‘na de mezo mare; velezemo in su; può se cassemo de qua via a la volta de Caorle e vegnimo avanti finalmente ai Alberoni. Co’ semo ai Alberoni, semo al seguro.” Niente, ciò! L’à volesto andare de rasovia a la costa.

S = Per farse obedire, zente, i gera boni de darte co le spade.

DP = Ma vardè..!

L = Mària!

B = Co le spade?

S = Sì bem, de piato …

G = Insoma da le diese diese e meza de note che i xè rivai, semo riussii a ‘ndare tuti e tredeze fora che gera matina.

S = E co ben bem se plache el fortunale, no salte fora la luna!

G = E elo:” Andè verso la costa per usire da la linea de la luna..”. E intanto rassi e canonae chè i n’aveva visto.

S = Minga che i ne copesse, gera che se una canonà ne ciapeva e ne buteva a fundi, perdemunu el batelo, e po’ chi ne deva da magnare a nu e a le nostre famege?!

G = Oramai se trateva solo de scampare, ma le so barche, i so brigantini, i so palischermi, le xè mondo ma mondo pì lisiere de le nostre.

B = E alora?

S = I l’à ciapai tuti, quasi tuti co l’equipagio, manco i tre o quatro che sa butà in seco e i omeni xè scampai.

DP = No i li coparà minga?

                                                     5

G = Mi no so; no credo; coi batei, però, chi i à ciapà in seca, i ‘striaci ga

fato un bel fogo.

B = Cossa?

S = Eh ciò, brusai tuti i li à.

DP = Che na saeta me li fulminesse.

L = E sensa averghene colpa.

G = Bon sì: i n’à costreti.

S = E in pì i a volesto fare de testa soa.

PV = Però Garibaldi lo gavè salvao ?!

S = Tasi, valà, g’avarave mancà anca quela …

B = E dove ca sia adeso?

G = Chissà; no verso ste parti: a s’à incorto anca elo che el bloco intorno a Ciosa e Venesia a xè mondo ben tenuo.

DP = E i dani chi li paghe?

S = Nissuni. No i na dà niente prima, gnanche una pipà de tabaco, figuremose adesso.

B = E Venesia …?

G = Venessia? Zente: semo restai soli. Soli contro tuti: ustriaci, franzesi,

napolitani, spanioli, quei del papa; gavemo tuti contra. Semo come la coa

de le lusertole che se muove anca dopo che la ze sta tagià. Mileotosentoquarantanove: un bel’ano! E semo apena in agosto.

PV = Vedarè che la se gira ..

DP = Speremo.

    ‘NDREA = Zei qua!?

G e S = A Ciosa te ze? Come astu fato!?

DP = Ti me pari mondo strusià.

L = Che siereta che l’à.

B = Cossa ve ze suceso?

G = A gera nel Furioso.

B = Orcamadele!

PV = Dine, fio.

‘N = Cossa volè che ve diga … Quei che i à ciapà i li à copà tuti!

L = No, no puole ‘ssere!

PV = Tuti chi?

‘N = Dei soi, de quei de Garibaldi; anca un prete, e un pare co i so do fioi. I li à messi contro un muro e i ga sbarao. E po …

                                                   6       

B = Cossa?

DP = Fantolin: piansi, sfogate.

L = A me fa pecao.

G = Cossa ze sta?

‘N = Ze morta la mugere de Garibaldi!

DP = Oh, povereta.

L = Mariavergine (si segna).

S = Ma come ze sta?

PV = Ghe ài sparà?!

‘N = No, la ze morta da sola; la gera in çinta e co tuti sti strussi … no la ghe l’à fata pì.

B = E dove?

‘N = A Ca’ Tiepolo, sul Po delle Tole, viçin Comacchio.

G = E dopo?

‘N = Mi no so altro. Su scampa via pì de fuga che ò podesto. Ghe gera anche i papalini che ghe deva una man a ciaparne … massabona che fra noialtri disgrasiai povareti se se aiuta sempre …

PV = E Garibaldi??

‘N = A ‘sta ora adovaria za essare da le so parti, a Genoa.

DP = Perdare la mugiere … cossì …

L = Povereto.

B = ‘Sti sfondroni de crucchi!

PV = Come talo parso?

‘N = Elo? A sa farse comandare e a sa quelo che a vuole. E co a dise una roba, quela la ze. E no solo a ciaciare. No a ze sta elo che a ze ‘nda fuora co chel popò de maltepo per alare i nostri bragossi!

B = I n’à contao.

PV = Cossì no’ a vien …

L = Sarà per un’artra volta …

‘N = Si bem,, no’ la finise qua.

                                                                                              Fine

                                                        7