Indove?

Giancarlo Varagnolo

Indove?

Luogo: interno di casa, e calle.

Personaggi: 5 o 6 donne, frate (o sacerdote).

TONIA (seduta con tombolo): Ciò, mi no' capisso, xé passa' do zorni e do noti e to pare no' xé gnancora tornao a casa da la pescà.

PINUCCIA: Vuostu che i sàbia persi in caligo?! Xé un bel puoco che duro sto stempo, ho tuti i ossi giassai.

TO: Cossa vuostu che i se perda! I xé dentro in laguna e to pare e 'st'altri pescaori co' elo i xé fin da fioi che i ghe va in batelo per là.

PI: E ciò, ma co' 'sto tempo …

TO: Vara, fia, che quando che ghe xé caligo, el mare a xé un ògio: no ghe xé pericolo che i se funda, no. E 'po a perdarse … ghe mancarave altro: co' loro ghe xé anca el vecio Barba Checco che a cognosse megio le mote, i ghebi, le canalete, le seche de la laguna che no' le calli de Ciosa.

PI: Per sforsa:'co a vien in tera a xé sempre sentao fisso incioda' al Do de Coppe col so' quartin de rosso.

TO: Rispetto, fia! Oh ben: basta che uno no' se imbriaga male e no' a inscominsia a dare de matto.

PI: Come mio (…) (si odono voci in “platea”)

TO: Sssita, tazi! Cossa xé mai?

PI: La me pare la Santina … e la …

SANTINA (dalla platea, poi dalla “calle” e quindi “dentro” casa): Che disgràssia! Che disgràssia! Tutti, tuti e sei. O Signore, o Madona, che disgràssia, che disgràssia!

MENEGA (viene dietro a SA): Poveri disgrassiai, poveri disgrassiai! Morti i li ha trovai, i li ha trovai morti!

SA: Tonia, che disgràssia, che disgràssia! I li ha trovai morti, morti, nel cason in valle. Tonia …

ME: Che disgràssiae, ma che disgràssiae che semo, che disgràssiae! I xé morti …

PI: Mariavergine! Cossa dixé done, cossa dixé, cossa?

TO: Ma cossa xé?! Morti? Tutti!? Seu sicure, seu? Dove, oh? Come, per cossa? Chi xé sta?

SA: No' se sa ben, no' se sa. I li ha trova' tuti e sie instechii duri intorno a la tola, morti cossì come gnente, co i oci verti sbarrai, sentai a tola, sentai.

ME: E el fio che deva fuora de testa, fantolin.

TO: Che fio?

SA: El puto de batelo, el fio del Momolo che a gera a 'spetarli nel cason.

PI: A elo no' i ga fato gnente, oh? Stalo ben, stalo?

ME: Sì, tazi. A xé drio contarghe tutto al prete.

SA: Astu capìo, Tònia: i xé morti.

TO: Ah, Signore. Ma almanco se savesse percossa e percome. Morti … Disgràssiai loro e disgràssiae anca de pi' nualtre: za che gera fame, adesso …

PI: Povero pare, povero fradelo …

ME: El Signore no' doveva torseli cossì … (voci in platea: arriva DORA col FRATE)

DORA: De qua, a vegna padre, a vegna.

FRATE: Che fatti, che accadimenti: la mano del Signore … Speremo che la sia cuela del Signore, speremo.

ME: Xé drio venire el frate … Vedemo cossa che el fio ga contao a elo. Speremo ben, a gera cossì scaturio ch'el povero fantolin, a gera!

TO: Sì ben, vogio proprio sentire come che la xé 'sta storia, come che xé la sta', capisso che mio marìo a sia un baruffante, ma però 'st'altri çinque …

PI: E mio fradelo …?

DO: Che storia, done, che storia! Poverette vu!

FRATE: Il Signore sia con voi. Coraggio, che quel che el Signore fa … bià ciaparlo come che a vien, e dopo … dopo, insomma …

TO: Come sarave a dire? Cossa xé sucesso? Come xé sta'? A me diga, padre, a me conta.

PI: Ma xéi proprio tuti morti, tutti?

FR: Sì, tutti. Xé scampa' solo el povero fio piccolo perché … perché …

TUTTE: Perché …?

FR: Perché no' l'ha fato gnente.

TO: Gnente de cossa, gnente?

SA: E i altri cossa gai fato, i altri?

FR: I ga manca' de rispeto a un morto.

TUTTE: Un morto? Che morto?

DO: Quello che i ga pesca', quello che i ga trova' in acqua e i ha tira su …

ME: Ma senti che fati: un altro morto, un altro.

SA: Ma alora i xé sète i morti, sète.

PI: Oh Signore benedeto!

TO: Ste' site! Lassé ch'el frate ne conta. Alora …?

FR: Eh … alora … Donca: pescando, quando che sarave sta' megio che i fusse restai a casa sua …

TO: Come sarave a dire, padre? Percossa no' i doveva andare fuora in laguna a pescare? Mi no' so, mi no' capisso.

FR: Almanco ne le feste comandae se dovarave rispettare el riposo del giorno consacrao, e lori, ciò, i xé 'ndai a pescare poprio el dì … eh, un puoco de respetto per le aneme dei morti!

ME: Ma che morti? Lori? No' capisso!

DO: Ma sì, tose, i morti morti del do novembre, che gera geri l'altro!

SA: E cossa c'entreli? Minga i ga fato malegrassie a lori i nostri omeni!

FR: Va ben, lassemo pèrdare el dì de i defunti, però, eh ciò, però cuelo che m'ha contao el fio …

DO: Anzoletto a se ciame, Anzoletto.

TO: Tazi!

PI: Cossa galo contao 'sto fio, 'sto Anzoleto?

FR: Che …

TUTTE: Che …?

FR: Che el morto a s'ha …

PI: El morto …?

ME: A s'ha …?

DO: Tira' su! In piè, in pie.

PI: Distu!?

TO: El fio piccolo ha dito cossì: che el morto a s'ha tira' su? Ma come?

ME: Ma alora a xé resuscitao!

SA: E 'desso xelo vivo? Camìnelo?

PI: Mariavergine: dove xelo?

FR: El morto xé mortus est non più bulegaribus. Però ghe xé sta un momento che a s'ha … come posso dire … a s'ha demissia' rabia'.

TO: Padre, a varda: a me fassa un piaçere a mi, e vualtre ste' site onsinòe ve dago una savatà in tel suco, e elo, padre, a ne conta tuto, ben pulito, dal prinçìpio. Che mi vogio capire, mi.

DO: Ti ga razon! (TO fa cenno di darle un manrovescio)

FR: Alora. Mentre che i pescheva, tirando su la rete i la sente pesante, cossa xé cossa no' xé: i vede che a xé un omo morto. Alora i lo tire su dentrobordo in barca e, finia la pescà i reme verso el cason per farse una magnà col pesse ciapa'. Imagino che sia sta' cossì.

SA: Ma el morto, a gera morto …?

FR: Può essare che sia morto niega' o che i l'abia butta' in acqua dopo averlo massao: xé ancora da vedare, da indagare.

TO: E i nostri omeni, come xei morti, come? Li gai copai? Li gai gnegai? Cossa …?

DO: L'Anzoleto a n'ha contao tu...

TO: Lassa parlare el padre! A ne diga, a ne conta …

FR: El fio, 'sto Anzoleto, …

DO: Fio del Mo... (gesto di TO)

FR: La storia che a m'ha conta' xé questa: pronta che gera la polenta in tola e el pesse quasi rostio, e qualche goto de vin za bevuo, penso mi in bona fide, i ghe dize al fio: “Orpetina, se semo desmentegai de ciamare che l'omo là che ha ciapa' el sono in barca. Ciò, puto, vaghe a dire a chel indormensao che xé pronto da magnare in tola. E el fio (…)

DO: L'Anzolo …

SA: Avemo capio!

FR: … a va.

PI: E no' a sa incorto de gnente? Che … che … quelo là a gera … a gera …?

FR: No, no' ha sa incorto de gnente, anche se ga fato strànio che a fusse un puoco massa bien de aleghe. Cossì a m'ha conta' 'sto fio. “A se svègia, paron, a se svegia ché la polenta xé robaltà in tola! I lo aspette de là.” E ovviamente el morto no' se muove. Cossì el fioleto, no' savendo cossa fare, a torne dai altri e a ghe dise che el

l'omo no' se svegeva. “Insisti, insisti!” ga dito 'staltri, e no' a capiva perché i se rideva. Cossì a vade novo a la barca, e 'sta volta el l'indormensao a se muove, a se alse e a ghe dise:”Dighe che vegno.” E el fio ghe lo va a dire, ma no' la fato a tempo de dirghelo che el l'omo, che elo , fantolin, no' saveva che a gera un morto cadavaro, a xé là drio de elo e a ghe dize, con una voçe, a m'ha dito l'Anzolo, da fare scaturire i lioni, “Percossa ave' da tiore per el cu... in giro ìsto povero fio? Che furbi! Che bravi! Che coi... coodardi! Adesso venì co mi là dove che za su!” E sensa gnanca una sillaba dita, i xé restai tutti impalai duri stecchii, morti. E el òorto xé 'nda' a destirarse dove che a gera in barca fra le reti, e dove che i lo ha trova'.

DO: A l'Anzoleto, fantolin, ghe xé venuo el convulso e ancora adeso no' lo riussimo a calmare: a treme tuto, povera creatura.

PI: Mi m'avarave fatto a dosso da la paura!

DO: Beh, anca elo, me sa, da come che a spusse.

FR: Cossì, done, questa xé la storia, questo xé cuelo che xé suceso. Ne la vale là in laguna.

SA: Bela vale sì: desgrasià!

ME: Sète morti.

PI: Maria Santa! La Vale de i sète morti.

FR: Preghemo …

[La Sesta Donna, Ernestina, potrebbe apparire all'inizio e dopo aver cantato E tiote i remi e vuoga potrebbe spiegare a PI come si svolge la pesca con la “batarela”, ed eventualmente defilarsi dopo l'arrivo di SA o partecipare con qualche battuta di spirito.]

Clugia Minor, 13 novembre 2017

vg