Dei 7 morti.

Giancarlo Varagnolo

Dei 7 morti

adattamento per teatro

della leggenda lagunare

I sette morti

tratta da "La Leda senza cigno"

di Gabriele d'Annunzio

*°*

"...lungo la proda del canale, sul prato violetto di santònico,

le ombre glauche dei suoi morti."

(5 donne, sedute a semicerchio su semplici sedie, che lavorano a tombolo: Nonna, pratica ma melanconica; Madre, fastidiosetta; Sorella, ridanciana; Nipote, ingenua; Cognata, calma.)

MADRE: Che tempo! 'sto caligo, 'sto caligo a tiole la vita!

NONNA: Per pescare xé ben, fia mia! L'acqua xé lìssa come 'n ogio e baste un luminéto, in 'sto scuro, perché el pesse vegna da la toa.

MD: 'sto scuro, xé 'sto scuro che me dà fastidio! e 'sta giasarela che te bagne i cavei, i vestìi, … Ho i déi indurii dal fredo.

NIPOTE: Ma no i ghe vedarave megio de giorno col sole, o nona?

MD: Quelo che digo anca mi!

NN: Se' una pi' storna de 'st'altra! Ma no' savve' gnente ..!

SORELLA: Le sa quello che ghe comode a lore!

MD: Ti tasi, che ti le avansi ancora da geri!

NI: El lumineto per cossa lo impeselo, ciò?!

SR: Per trovare la boca per bévare quando che i à se' !

COGNATA: Ma per far vegnire visin i pessi! cossì i li ciape co' la rede.

NI: Ma col ciaro , i dovarave vedarla meggio, i pesssi, la rete, oh!?

CG: Ma lori minga sa cossa che xé una rede o un cogòlo finché no i ghe xé indentro.

SR: E dopo, bonanotte sonadori: prepara la fersura e el fersuron!

MR: E sì, co gera vi(vo)..

NN: Col nono gera vivo ... Xé za passa' ... Ti geri apena nata.

SR: Anca el zio ...

CG: E el so povero fradelo zovane ...

MR: Tiò: moleghela! Za ch'el tempo fa venire l'angossa, tire' fora anche 'sti discorsi!

SR: No' ti avara' minga paura, oh?!

MR: Ma che paura e paura! Chi muore el mondo lasse ...[chi vive se la spasse]! Xé 'sta giasarela che me sento indosso che no' me piaze ... e no se sughe gnanca gnente de quelo che ti lavi.

NI: Ma xei morti tuti assieme, oh, in mare!?

MR: Ancora drio ti va?

CG: Magari fùseli morti in mare: una se consoleva pi' façilmente! Invese no, i xé morti così, qua zo de cale.

NI: Qua zo de cale? Mariavergine! Distu sul serio?! E dove?

SR: Sotto el portego; ti sa che ghe xé un tantin: sa copà uno e à stramasa' zo tuti 'st'altri.

NI: Sul serioo!?

SR: Ciò!

CG: Va che la xé drio a torte in giro.

MR (a SR): No' ti ha rispeto de nessun.

SR: E vedo ti! " Chi muore se la strasse e chi "... no' me ricordo pi'.

NN: Oh, ma 'sta fia no' sa gnente? No' gave' conta' gnente de gnente poprio!

MR: Certe robe no' le xé per mi, no' le xé.

CG: Qualche volta, me pare a mi, che sia megio stare siti.

SR: Parlare de' morti a una fantolina ...

NI: Ma adesso no' so' pi' una putèla: pode' anche dirme!

SR: L'ha razon, la xé ormai una dona fata: varra qua che brassi!

MR: Comìnsistu? Làssala lavorare, làssala!

NN: Sie i gera, sie, co' do' barche, me pare.

SR: I andeva a pescare in vale, dentro la laguna, no' fuora in mare.

CG: Ma no' i aveva anca una barca granda per quando che i rancureva l'alega per le vacche?

NI: L'alega per le vacche?!

SR: E ciò! Anche a lore ghe piase el contorno co' le se fa do' vuovi in tecin.

NI: Eeh, vuovi in tecin?

SR: Ciò, co' scorso e tuto: ahm! un bocon da re!

MR: Ma cossa ghe contistu! Me la imatoni' che la fia!

CG: No' darghe drio a to' sorela. Però xé vero che un puoco de aleghe, de quelle giuste, i le magne le vache e el late ghe vien anche pi' bon. Co' 'st'altre, quele longhe come fili, i le use al posto de la pàgia ne le stale, così i risparmie bessi (gesto).

NN: Al nono no' ghe piaseva tanto: vuostu metare ciapere una barca' de pesse o impenìre una barca de aleghe? No, no' parlo dei schei, ma della soddisfasion de 'sti sièvali che salte vivi in santina de qua e de là!

NI: A mi i me fa senso, cossì sbrissosi!

MR: Cotti, però, oh ...! (gesto) Ti te lichi i déi, oh.

SR: La fia la xé delicatina, manina bela, fata penela, ma che porsèla ...

CG: Mòlighela, che ve conto mi. Dove' savere che buttao la rete, minga se sa sempre quelo che ti tiri su, e chela volta ...

SR: Traah! (si butta col corpo all'indietro contro lo schienale, gambe e braccia stese rilassate; voce greve) Su morta: cossa volìu da mi, cossa volìu-u.

NN: Magari avesselo parlao sùbito! Inveçe ...

NI: Chi? Ma perché, dopo l'ha parlao? A chi? Al nono?

SR (voce roca): Tasi e ascolta-a-a, inseme-nia-a h!

MR (a SR): Ciapa su el to' lavoriere inveçe de fare ti la insemenia, cio'!

SR: Eh, ma no' se puol mai schersare, no' se puole!

NN: Ti ha visto a schersare cossa che puole capitare?' El rìdare va in frìsare!

CG: Prete a sa fato, prete.

NI: Chi sa fato prete?

MR: El fio, quelo che xé resta vivo e n'ha contao tuto.

NI: Anca un fio ghe gera? Dove? Ma fio de chi? E dove gerelo? Mi no' capisso pi' gnente.

SR (voce profonda): Ghe gerra una volta sie pescaori, che i xé 'nda' a pescare e oltre che ciapare pesse, aleghe e gransi, i ha tira' su anche un omo ... gnegao.

CG: Sì, un gnegao portao in vale da la sevènte e restao in seca su un scano quando che ghe xé sta' dozàna.

NI: Oh?! Cossa?

NN: L'acqua che cale (dozana) e (sevente) che cresse: co' la cresse la vien dentro in laguna, co' la cale, la ritorne in mare.

SR: E 'sto morto gnegao a gera là su la velma imberondolao. (esagerando) Là, ne la Vale che adesso xé dei 7 morti; dei 7 (...)

MR: Molèghela, o done!? No' ghe xé qualche corno novo da contare, o qualche stomegosa da petenare? I morti, i morti le me tire fuora, ma varé, varé!

NI: Mi vorave savere ...

MR: Cossa? Dime!

NI: Ma ... ma ... ma xé morto anca el fio pìcolo, oh?

MR: No!

CG: A s'ha fato prete.

NN: Fantolin! L'ha ciapa' una de chele paure ...

SR: Ma che paura! La fame l'ha instruspiao!

FI: La fame? Mare: conteme una bona volta 'sta storia, 'sto fato che pare che tutti sàpia fuora che mi.

CG: Vien qua che te la conto mi.

SR: Vorave che ghe la contasse anca mi!

NI: Ti no' ti le conti mai giuste, sempre che ti mincioni!

MR: Ghe dago mi una bela petena', cossì vedemo se la se calme!

SR: Xé sta' el fio piccolo a contare.

MR: Tazi!

CG: Sì, questo xé vero: xé stao el fio a contare.

NN: Fantolin, robe che a se sòfega da tanta roba che a sa messo in boca tutta s'una volta.

CG: Quando che i lo ha trovao.

FI: Dall'inissio-o! Se no no' capissio-o! Varé: me su perfin fala' de un ponto co i vostri rebuobolamente de sta storia.

MR: Ti ha razon! Demoghe un tàgio, e amen peter-nostro così sia.

NI: E no, ciò, no!

SR: Alora, senti qua, ascoltame mi. Un dì che el nono, so fradello, el zio, el cugnao, e ... nostro pare, xé 'ndai in laguna.

CG: Per un carico de alega.

SR: Passando co la barca viçin una barena, i vede el corpo de un gnegao.

CG: E i lo lasse là, contunuando a laorare.

SR: Co ha fato l'ora della merenda, i se ferme in costa de chela barena per farse la polenta e rostire do ... (guarda verso la MR poi CG)

NN: Me sa che i aveva solo fighi da magnare, chela volta.

CG: Intanto el fio piccolo, che gera andà in barca co lori, a fa un puoco de corse e zioghi sulla barena finché la polenta bogge, e patapùnfate!

SR: A vede fra le aleghe, proprio in rivetta, un omo destirao: "Ma varda dove che l'ha ciapao el sono, 'sto bao, a xé mezo in acqua, tuto bagnao!"

NI: E a gera el morto?!

MR: Ah, co 'sti morti!

CG (tentando di sussurrare): E el fio a torne indrìo; e come che a vede so pare a ghe dize: "Là in fundi, nel'altra riveta, ghe xé uno che dorme destirao, ma mezo butao in acqua!"

SR: "Va', e sveglialo, che venga a mangiare con noi."

NI: Ma so pare no' saveva che a gera morto el morto, quelo gniegao?!

NN: Quando uno xé storno a crede de essare furbo e a combine desgrassie malegrassie!

CG: Il fio volte de corsa, a ghe dà do tre scossoni alla spalla de l'omo destirao che ... E ciò: a se svege, a se tire su in pie e a va verso la barca dove che la polenta gera bela bianca che fumeva sul tagèro.

SR (con le gote gonfiate, come fosse un "pesce"): Sciu s-qua, sques scuosciua ..

CG: No' a fa in tempo gnanca a dire una parola che tutte e sei, tuti .. e .. sie i fa un crepo!

NN: Sì, el fio a gera dadrio de elo, e l'ha dito che no' la fato niente; 'st'altri ha sbasao la testa e xé cossì che i li ha trovai, duri.

NI: Morti; instechii!?

SR: Durri, compreso el gnegao. E el fio piccolo, vogio vedare mi se no' a xé 'nda via col succo! Sete omoni morti stechii, e da una note e dai do … aspeta e aspeta.

CG: Al terso giorno avemo pensao che qualcossa xé suceso, così avemo mandao el veccio Memo col so' barchin a butare un ocio: roba che perdemo anca elo da la paura che l'ha ciapao.

NI: Che storia, ciò! Varda: me xé venui i penoni sui brassi, me xé venui!

SR: Mi la savevo za, e me pare che ghe fusse anca un can.

CG: Un can da batèlo? Mi no' credo, perché a savarave incorto che el morto a gera morto … No' i xé minga mona chei cani là: i ha el naso da bon, a s'avarave incorto, a s'avarave.

SR: Distu, ciò?!

MR: Mi digo che ghe la molemo, e che andemo anche dentro ca' che mi su tuta indurìa dal fredo.

CG: Eh, e da che la volta i la ciame la Vale de 7 morti, i la ciame, eh …

SR: (voce lucubre) “Sie i gera e i xé andao a pescare-e-e ...”
MR: Andemo, andemo, che xé ora de preparare la polenta, movèmose.

SR: (voce cupa) “Vaghe a dire che a vegna a senàre, zo, fia, muovite!”

MR: Mòlighela! (s'alzano e raccolgono sedie ed eventuali tomboli o telai)

NI: Cossa credistu: de farme paura, ciò?!

SR: (attraverso lo schienale della sedia appoggiata sulla testa, voce truce) “Su qua, me ciamévi!?”

NI: (pende paura) Aahh! Nonna, vara cossa che la me fa!!

MR: Moléghela! Avanti a casa. Ma no' ave' fredo? (via)

SR: Megiòto! Fifona! Puina! (lenguaccia, via)

CG: (spingendo delicatamente NI che fìfola) Ma no darghe drio: ti sa che se no' la cogione la zenteno la xé contenta. (via)

NN: Eh, la valle dei 7 morti: sie pescaori ciosoti i gera e, col morto, sette. (via)

Clugia Minor, 15 luglio 2017 (23 dic. 2016).

Giancarlo Varagnolo

 Suggerimento: al rientro per ringraziare il pubblico, le donne potrebbero contare E tiote i remi e vuoga .