Tombola, a bastoni.

Giancarlo Varagnolo

TOMBOLA, a bastoni.

• Scenetta tragica -

Personaggi: 3 donne, 1 uomo.

Scena: calle.

CENCIA(entrando): Devo confidarve un segreto, che 'po no' a xé tanto segreto perché a la tombola zioghemo tute, nualtre done. Ma no' a xé proprio un ziogo: xé pi' che altro de stare assieme. Beh, sì, ciò: ghe xé quele che ogni tanto, co' le ha mondo de culo, de fortuna, capìme!, le se mete in scarsèla un puoco de scheèti, sì, scheèti perché zioghemo solo dieze franchi la cartèla … e i se li magne tuti in sgolozesi, e le fa ben, sacranon!, ché se fusse per nostri marìi … i ne tegnirave a polenta e sgarissi ostiai! E acqua, mentre che lori, ah, se i sbevacce in ostaria, se i sbevacce! E xé per questo che ho capìo, co' i ani passando, che co' i oci fisi su le carteline e le rece drite a penelo per stare alerta per sentire i numeri che veniva fuora, ciò: me desmenteghevo de tuti i fastidi de la zornà: gnanca un pensiero, gnanca un strùssio, gnanca una pitama: numeri e basta. Sperando de vinsare, ma no' per i schei, ma per farghe cica-ràbia a le altre done o per no' farse tiore in giro da le altre done rufianasse co' i so campatimenti da gesuita falso. E 'po ti ti stà sentà queta … becolando qualche sema o ciuciando un menton.

NENA (entrata poco prima): Ah sì, che ben: sentae in un cantan, d'inverno: che ben al caldo che ti stà, mi 'po che su fredolera … E 'po ti ridi, vero Cencia? Che xé de quele che ha de che le lengue … çerte xé proprio lenguasse, ma certe ganghe che le ghe da' a chi che so mi … Mi me rido mondo. E 'co le ciame i numeri de le bale: fale puoco s-ciopare dal rìdare certedune?! “22: le anarete. - Col culo basso come careghete!” “El ziogàtolo de la note! - Mi no' lo ho. - Mi l'ho doppio! - Ma lo salo to marìo?” E 'po ghe xé la Rita che se confonde sempre co' i nùmari … no' se sa se xé perché la ghe veda puoco o perché gnancora no' a li cognossa … E la Osvalda, ciò, che me piaze mondo puoco co' tuto ch'el porchizare quando che no' vien fora el numero che vuole ela: porcodissare de qua e diavoloporco de là. Va ben: ghe xé anca lore al mondo, però … Oh, andemo?!

CENCIA: Speremo che la sia in casa.

NENA: La n'aveva dito che la ne 'speteva.

CENCIA: Sì, ma in ciesa.

NENA: Ah … Ciamèmola, vedemo se la ghe xé. (gridano) Adele! Adele!

CENCIA: Adele! Ghe xèstu?!

ADELE (da “fuori”): Adesso vegno! Aspetta che me meta la blusa!

NENA(ridendo): La me pare el Barbasucon: “aspeta che gaga pali!”

CENCIA: No' farte sentire! Ti vuoi che la te manda a remengo, oh?!

NENA: Eh càssine: che no' se puossa mai schersare!

CENCIA: Ti sa come che la xé l'Adele: la se la ciape co' gnente.

NENA: Oh, ciò, se ghe bruze mondo, che la se taca un bolin co' l'itiolo!

CENCIA: Ma anca ti ti xé una cata-ràdeghi, ti xé: percossa astu da cogionare tuti?

NENA: Hou, e chi cogione? Ho solo dito che la me fa venire in mente el Barbasucon, quelo de la fiaba, per come che la n'ha risposto, minga che la xé un Barbasucun … anca se l'anda che ha ela, per no' parlare de so marìo …, oh?!

CENCIA: Velaquà che la vien.

ADELE: Su qua! Destrighèmose prima che no' se ne incorsa mio (marìo).

MENEGO(“alla porta” di casa): Dove vastu?

CENCIA: Mariavergine.

ADELE: Dove che voggio!

MENEGO: Lo so: l'ho capìo; ma mi, mi vuolarave savère dove, indove che ti xé drio a andare.

ADELE: Qua viçin, co' le mie amiche.

MENEGO: Patrone, bondì. Anche vu andé dove che va mia mugiere? E dove xé che andé, se puole savere?

CENCIA: Qua … qua viçin, dal coso ….

ADELE: Andemo a la botega da biava in cale Torso a comprare el bacalà.

NENA: Ma prima andemo a ziogare a la tombola: no' ti vorà minga portare el bacalà da la Romilda, oh?! Le ne mandarà a remengo!

CENCIA: Cossa distu?

ADELE: Se ti vuoi andare, vai, ma mi ho da fare le mie spese.

NENA: Ciò, che fati! Se vede che ho capìo male mi: mi credevo che nu andessimo a ziogare a la tombola. No' avemi parla' cossì?!

CENCIA: Eh, me gero sbaglia' … de zorno.

ADELE: Eh! Spese ancùo.

MENEGO: E no' la se tiole la sporta, parona, se l'ha da fare 'ste spese?

ADELE: Ti ha rozon! Se no' ti ghe fussi ti, marìo, no' savarave poprio come che farave. Se' stae vuialtre a farme fuga, e mi me su desmentega' de tiore la sporta. Vago a tiorla: aspeteme che vegno subito! (va “in casa”)

MENEGO: E vu, parone, no' ande' a comprare gnente? (quasi a parte) Vualtre done per spendare se nate aposta: se no' bute' via un puoco de schei ogni giorno per strasse, fuffignesi e monade no' se' gnanca contente … fusseli almenco schei vostri! (alle 2 donne, ironico) Spese , oh!?

CENCIA: Mah, no' so, vedaremo …

NENA: Mi ho la mia sportina, ma la xé piena de pessioi. Ghe ne vuòlelo un puoco, barba Menego? Le altre se porte i fazioi per segare i numeri de le cartele de la tombola, ma mi inveçe me porto i pessioi duri cossì ogni tanto me ne fico qualchedun in boca e lo ciùcciolo. Ghe ne vuòlelo? Eh, bià avere i denti boni per sfregolarli, ma mi li ciùccio!

MENEGO: Donca, ande' a ziogare a la tombola?

NENA: Eh ciò!

CENCIA: Sìi, ma una volta ogni tanto … per passare via …

NENA: Sìi, anche quattro o çinque volta le setemana … E se fasso tombola me compro i folèti co' la ua.

MENEGO: E 'co perde'?

ADELA (tornata): Su' qua, co' la sporta. Cossa hala perso?

CENCIA: Niente, se parleva …

MENEGO: Del ziogo de la tombola! Quanto xé che zioghe' a cartela? Quanti schei xé che bute' via ogni volta? Oh! Se puole savere, se puole?

NENA: Boh, minga tant..(...)

ADELE: Ma cossa ne viestu a indagare? Per do schei marsi che ne va via! Ma varda che noli! Ma varda che omo! Ma xestu de la Questura? Ma xestu de la Finansa? Ma zestu de la congregasion de san Vinçenso oh?! Ma mi a ti te vegno a domandare quanto che ti ti ha bevuo in ostaria, oh? Te vegno a reclamare, oh, a ti quanti schei che ti t'ha magna' ziogando a briscola? Quanto che 'st'altri boni paroni de i to' compari i t'ha busara' a panfin? T'hògiu mai dito gnente a ti, oh!? E adesso, ciò, …

MENEGO: Tazi! Che ti m'ha sempre magna' i sentmenti, altro che! Un omo avarà ben el dirito de svagarse un puoco, de bèvare un bicère de vin dopo una zornà de lavoro! E vuialtre inveçe … Cossa xé 'sta tombola, 'sto ziogo … seràe ore co' ore a segnare numeri coi fasioi! Inveçe de netàre in casa, inveçe de (…)

NENA: Cossa vuoravelo dire: che no' femo gnente? che semo sporche in casa? Che no' femo i nostri mestieri?

CENCIA: Per 'na volta ogni morte de Papa …! E 'po andemo a ziogare dopo aver fatto lìssie e prepara' el magnare.

ADELE: Mi gnanca no' te rispondo. Ti saressi un gran busiaro se ti disessi che no' te tendo ti e la casa: le bolete le vago a pagare mi, se xé da andare in Comune per una carta vago mi, se gera da portare i fioi a farli vositare andevo mi dal dotore, se se rompe qualcosa … e 'po cusi, stira, … E elo, ciò, co la so pipa in boca … a lègiare …

NENA: Tiò?! Anca a legge? Cossa? Anca a mi me piasarave, ma (mentendo) i oci, ciò, no' i xé pi' quei de una volta.

CENCIA: Ma quando mai hastu leto? Ti no' ti ha gnanca fato le scuole!

NENA: Eh, da le Canossiane: el catechismo, le orassion, …

ADELE: Dai, dai, andemo che el sole magne le ore! Cossa stemo ancora qua a ciaciarare?! E ti, pitosto, fame el piasere, inveçe de legiare chel libro, varda se ti me fa un puoco de pispiolete, ti, de legna co' la manèra ché ti va sempre drio che ghe rovino el filo perché, ciò, per ti, no' su bona a 'doperarla . El fuogo però lassa che lo impissa mi quando che torno: ti ti metti su tanta de che la legna …! Ti t'ha abitua' massa ben in barca a fare bronse per rostire, ma el legno là lo ciape' sora acqua, lo ciape'.

MENEGO (irato): Va ben. Ma quando tornistu a casa ti, oh? Che sappia almanco.

ADELE: Che omo! Che croze! Torno quando che ho finìo! Quando che ho fato le mie robe! Astu paura che no' te prepara la çena, oh?! Quando mai hastu dovesto 'spetare el disnàre? Ma gnanca quando to fioi gera picoli: la to polenta calda de bogio ti l'ha sempre trova' bela pronta robalta' sul tagèro. E se ti la magna' giasà xé sta' per colpa toa: perché ti geri sta' a remengo tuo e di xé vegnuo a casa a ore strazore … sgambarezando.

MENEGO: Ma quando mai? Ma quando? Ti, pitòsto, ti (…)

ADELE: Mi, cossa?

CENCIA: Mi vago; ciò, me perdo de fare i mi' mestieri, e 'po, e 'po su' stufa: sacranon! Sempre ràdeghi, sempre sighi! Valà baruffe ciosote ...! Oh, adesso che su vedova co' fioi e fie sistemai, ciò: vògio un puoco de paze!

NENA: Sì, andemo, che le avarò zà inscominsiao a ziogare.

ADELE: Ssss sì, andemo andemo: tanto le xé sempre quele, sempre le stesse lagnanse: ti xé un tormento, una pìtima, marìo, ti xé un dèbito mai pagao!

MENEGO: Ah, mi? Mi pìtima!? A mi …!? Vedemo se te schisso soto i pie come un sagiaròtolo! Vedemo se te ciapo per le brene e te remeno per i gatoli via! A mi 'ste parole! A mi: a to marìo?!

NENA: Signore benedeto: i se dà, i se dà!

CENCIA: Andemo prima che i se meta le man adosso! Varda che vien zente!

ADELE: Prova a tocarme che te cavo le carne de gola e te sgrafo i oci! Cossa credistu: d'avere a che fare co' chele (…)

MENEGO: Tazi! Tazi, se no' ti vuoi che te spaca chel çervelo marso che ti ha!

NENA: Calmève, calmève. Mariàvergine benedeta …

CENCIA: Andemo, andemo; Adele, mòlighela! Varda che vien zente, che i …

ADELE: E che i vegna! No' ho minga paura mi; no' ho gnente da scondare mi. Che i vegna: cossì i vedarà che capitale de marìo che ho! Come che a me trate; cossa che a me dise, cossa che a me fa!

MENEGO: Cossa che te fasso mi, MI?! Ti, pitosto, bruta sprota : sempre che ti fassi de testa toa, sempre che ti vogi avere razon ti, sempre che ti fassi i to comodi, sempre che ti vogi avere l'ultima parola ti!

ADELE: E percossa no? Su mi che mando avanti la famegia! Ti cossa fastu? Ti, cossa astu fato ti fin adesso, oh?, dime, zo, dime.

MENEGO: Mi … mi ho sempre lavora', note e zorno … per no' farte mancare gnente a ti e ai fioi; me su strussia'…

NENA: Fusselo cossì mio marìo …

ADELE: Sì, sì: ti avaressi fatto tutto per mi …. Ma vaghelo a contare al prete in ciesa, cossì a te mande in paradiso! Per mi cossa? Ti lo fa per ti, per farte vèdare da i to amiçi, perché ti xé un cagagio! Cossa credistu che anche no' sappia chi che ti frequenti co' ti va fora de casa? La zente ha oci e boca, e cossa che no' ghe piaze, 'co la te puole, darte dele stocadine.

MENEGO: No' cambiare discorso, quel che ho fato mi, l'ho fato da omo. Ti, pitosto, (…)

ADELE (inviperita): Cossa! Ahh, perché ti xé un omo, e che omo, ti credi de poder fare che casso che ti vuoi ti?! E mi dovarave no' solo ingiotire, ma anche privarme de quelo, oh, de quel puoco che me piaze a mi? Cossa sugiu una serva? Sugiu una sc-iava nera: sì badrone, gomandi? Ve piazarave cossì a vuialtri omeni: comandare e essare servii, e fare i stracassassi vostri e … andare a troge! Cossa credisti che no sappia?!

NENA: O Signorbenedeto ...!

CENCIA (a AD): Cossa distu?! Cossa tiristu fuora!? Tasi! Andemo via.

MENEGO: Cossa distu?! Cossa me infenocistu su?

ADELE: Se la zente sussure, le mie rècie ascolte per sforsa.

MENEGO: E ti ti ghe credi a 'ste tagiae de berondoli invidiose?

ADELE: Che ghe creda o no, a xé un altro discorso! E ti no' cabiare el discorso, perché qua, mi, adesso, Menego, mi, che te piaza o no, MI, vago a ziogare a la tom-bo-la.

MENEGO: Provate a muovarte …

ADELE: Ti puoi cantare e balare, saltare e sigàre, ma mi no' te acolto pi' ti. Andemo done! (dà le spalle a ME)

MENEGO (afferrando AD, girata, per un braccio): Ti de qua no' ti te movi!

NENA: Màriaah !

CENCIA: Savevo, savevo … i se dà.

ADELE (fredda): Mòlime. No' fare che ti t'abbi a pentire. Mòlime. Mòlime, te digo. (quadro: Ne e CE esterefatte-impaurite, AD eretta-calma, ME irato ma interdetto / 10”)

MENEGO (brusco ma “calmo”, sempre tenendo la mano sul braccio di AD): Va ben; va ben. Fai come che ti vuoi. Va ben. Fai ...

ADELE (senza girarsi né guarda ME – la stretta al braccio s'è già ammorbidita): Mòlime.

MENEGO (roco; non lascia la presa, ma è AD a scivolarne fuori): Va ben; vai.

NENA: Ahsssignore

CENCIA (sottovoce con occhiataccia a NE): Ss tasi e muòvate.

ADELE: Ben, podemo andare. Andemo.

CENCIA: Bondì; a rivedarse, paron Domenego. (prendendo sottobraccio NE)

NENA (come destandosi): Bondì bondì, a riv... (strattonata da CE si gira e va)

ADELE (fa un passo o due poi si gira, a ME, tono “naturale”): Torno fra do orette. No, varda: (guarda da presbite l'orologino che ha al polso) fra do ore esatte. (tocca-guarda l'orologio) Belin, oh?!

MENEGO (abbozzando): Mmh, ssì .. (CE e NE si son fermate e volate)

ADELE: Quando xé che ti me farà un altro regaleto cossì, o paron? Femo a Nadale?

MENEGO (passa dallo stupore alla stizza, e ingrugnito): Vedaremo, vedaremo: ghe tempo, ghe tempo. Va de (…)

ADELE (fra “il lusco e il brusco”): A rivedarse a rivedarse, bondì! (prima di uscire di scena, a ME “ingrugnito”) Do orette … esatte (alza il polso con l'orologio).

MENEGO: A bastoni la doveva andare, a bastoni!

Clugia minor, 28 novembre 2018.

G. V.

Lazzaretto nell'isola.

Lazzaretto nell'isola .

(atto unico)

Giancarlo Varagnolo

[il fondale della "scena" è la parete della chiesa, subito a sinistra o nord, il pubblico è alla destra al di là del sentierino; 3 letti con i contagiati, saranno nascosti-mascherati nello spiazzo antistante la parete.]

Personaggi:



2 uomini vestiti in abiti moderni,

in abiti ottocenteschi:

4 barellieri,

6 malati (2 sulle barelle, 3 su letti, 1 "in transito"),

8 donne,

1 frate,

3 medici,

eventuali comparse volendo ampliare il numero dei degenti e visitanti.

Scena I

Impiegato [entrando dal cancello assieme all'Operaio]: Beh, dove xé che avé trova 'sta roba?

Operaio: Là in fundi, un muccio de ossi! Vedaré, quanti cragni co i denti [atteggia la mandibola] de fuora! 'Na paura, paron!




Imp: Hi! Per do ossi! I ghe xé in bela mostra anca in ciesa.

Ope: Elo dize! ma che i te salta fuora cossì, d'improvviso, soto el baìle ...

Imp: Andemo andemo! Dove xé 'sta buza?

Ope: Eco qua, varé! I me fa senso.

Imp: Ostregheta! I xé bastante. No podemo minga lassarli qua.

Ope: I xé sta qua soterài fin adesso ... Ghe ributemo la tera de sora come che gera.

Imp: Bravo! E dopo vago su le rogne mi! Xé proibìo dal regolamento d'Igiene Pubblica; tuto ha da andare in çimiterio. Tìrali fuora: bià portarli fora de le Porte; ve mandarò una barca, cossì andé per fuoravìa fin al çimiterio.

Ope: E no paron, no! No' su minga un bechin mi! A se ciama i so propi adèti che fassa 'sto lavoro. Fusseli do ossi ... Ma vardé; e chissà quanti che ghe n'è pi a fundi. No xé roba per mi, no.

Imp: Mariavergine, che òmeni! Vaben, ciamaremo i bechini; vuialtri continué i lavori pi in là.


Ope [a parte]: Ma vara che noli: mi, mi avere a che fare co tuti 'sti morti?! [all'Impiegato] Ciò, ma da dove viéli fuora tutti 'sti ossi? No i me pare gnanca tanto veci; no i xé de la Guera de Ciosa, no.




Imp: E sì, de siecento ani fa! Ma va là ... I dev'èssare de quei che nessun xé vegnuo a tiorse ... dopo morto, quando che qua ghe gera el lazareto.

Ope: Lazareto?!! Ah, benon! I xé ossi anca impestài! No ghe fogio aver gnante a che fare, no paron, no!

Imp: Ma che peste! El coléra, el tifo ... pol'èssare; anche la pelagra ...

Ope: Va ben va ben, non xé roba per mi! Lazareto ... To, vara che i vien.

[entrano dal cancello le 2 barelle e le donne al seguito, silenti; vanno fino allo spiazzo dopo l'absidiola ove si defilano; esciranno poi le donne per aldare a "scoprire" i letti]

Imp: Bon; alora mi vago; ti vai avanti col to lavoro.

Ope: No no, che vegno via anca mi. Penso poprio che ... Ciò, me sa secà la gola, un'ombra xé poprio quelo che ghe vole, cossa dizelo?!

Imp: Andemo andemo, imbriaghela!

Ope: Un biccer de vin rosso no' ga mai fato male a nissun, a nissun.


Imp: Uno ... Sì, uno alla volta! Valà, che ve cognosso! [escono dal cancello]

Scena II

[le 8 donne, aumentando gradualmente il volume del loro parlottare, arrivano ai letti scoprendoli, 2 restano sempre con i degenti agendo a soggetto]

Checca: Ma dove zelo mio mario?

Gìgia: Veloquà, Checca! Vien qua; qua!

Dorìna: Mariavé, che siera che l'ha!

Eufèmia: No' steli a tocare! No' steghe massa visin!

Checca: Ma l'ho da cambiare! Senti come ch'a spusse: a s'ha cagà adosso de niovo. A madonasantissimabenedeta!

Tecla: Tirate su ben le maneghe e fate una sfregagion co 'sta pomàta, e dopo lavete ben le man co l'amoniaca.

Eufemia: E metare subito a molo i vestìi co torné a casa, savé done! Me racomando.

Nineta: Ghe vuolarave un puoco de fuogo qua: a xé giassà duro 'sto cristian!

Dorina: Ahh! A ma ghità adosso!!

Tecla: Làvate subito co l'acqua! Dopo de dago l'amoniaca.

Eufemia: Varda che no ti abi spuàciae su le vesti!

Dorina: A xé che a ghite ancora ...

Nineta: Cossa distu: ghe femo de le sfregagion?

Tecla: Le ghe vuorave calde.

Nineta: Lo so, ma no avevemo fuogo.

Checca: Podevi dirme che me portevo drio el scaldin!

Gigia: Ah, vardé: mi lo ho!

Eufemia: E dove te l'avevistu sconto ché no' a se vedeva?

Dorina: Co tute che le strasse che ti ha indosso!

Gigia: Oh ciò, mi co ho fredo me vesto, e se no' baste ... ve lo qua, che me scalda!

Tecla: Na volta o l'altra ti te bruzi la (...)

Checca: Petègole! Dame qua che scaldemo 'sti tochi de pano.

Nineta: Ho visto che i fa anca co le piere.

Dorina: I sfregamenti?

Eufemia: Senti 'sta qua! Ma che piere d'Egitto!

Tecla: I le 'dópere come le muneghe, per scaldarli.

Gigia: Santifeliceefortunato, varé come che i se muove!

Nineta: I xe che i va de schitela tuti e do! Ossignor!

Checca: Cossa vostu che i caga se xé do dì che no' i magne e che i va de diarèa!

Eufemia: I xé spasmi de le coliche ...

Tecla: Ghe vuorave un puoco de vin brulè.

Gigia: Ma distu?

Checca: Ghe mancarave solo questo, za che no' a se n'à sfondrà anca massa de vin col brulè e sensa!

Nineta: Però un brodo, un brodin ...

Checca: E dove lo vago a ciapare? Ghe lo fato geri e a me l'à butà fuori o de boca o de culo; scuzé, ma fie ...

Gigia: Dura la xé!

Eufemia: Sempre a nuialtri povereti ne toche! I richi: ghe n'à de brodi e de rimedi!

Nineta: Me sa che i xé lori che ogni tanto i ne invelene!

Tecla: Ma vuostu che i sia cossì depravai e sensa cuore?

Gigia: A mi dime!

Dorina: E varda qua dove che i ne mande a morire!

Efemia: Fìe, molemoghela, che ha incolpare i altri ghe xé sempre tempo! Vedemo de agiudare 'sti qua intanto.

Dorina: Tastu fato dare i santini benedii?

Checca: I santini ... Come che anche lori no' ghe n'avesse colpa!

Tecla: Cossa distu? Ti la ga su poprio co tuti ancuo! Anca i santi; mariavergine, che dona!

Checca: Vuolarave verdate ti: za un fantolin ho perso, e adesso vedemo mio mario che fine che a fa .

Nineta: Ciò, a mi i ma dito che co l'erba, quela là che se trove in barena, s'ha da fare dei bevaroni.

Eufemia: Ma cossa astu capìo?! Xé da metersela soto i scagi e su le lèsene dele gambe.

Dorina: E no' la spìsseghe?

Gigia: E come stala su 'sta erba?

Tecla: Ti te la meti dento le muande!

Gigia: Muande? Averle ...

Nineta: Distu? Ti xé sensa ... muande!

Dorina: Oh, la siora! Anca mi sa, no' le ho.


Gigia: Ti fa prima per [gesto d'accovacciarsi e sollevare la gonna] p(...)




Eufemia: Tazi! Xé qua el frate.

Scena III

Tutte: Sia lodato Gesù Cristo!

Frate: Sempre sia lodato, e sia con voi ora e sempre.

Tecla: Se sa gnente se la finise 'sta morìa?

Frate: Siamo nelle mani del Signore ...

Checca: Ma la xé una piaga granda, padre!

Frate: Piaga, ben dito: una piaga del Signore ...

Dorina: Ma perché, perché el Signore ne mande 'sti castighi!? Perché?

Eufemia: E sempre a i pi' descressiai!

Frate: Le vie del Signore sono infinite; che sappiamo dei disegni del Padre?!

Tecla: Anca questa lo za sentia! E za, 'po nel bofice la ciapemo sempre nu, la ciapemo.


Eufemia [a parte, tirandola]: Tazi! Zestu mata?! Col frate ti (te la ciapi).




Dorina: Ho na smania che ...

Frate: Donne, bisogna che preghemo! Che preghé! Che sia fata la volontà (...)

Checca: Ma padre, padre! La xé dura, la xé! Cossa fasso mi sa me muore, co tre creature picole che ho a casa, a me diga, padre, a me diga!

Dorina: No' pianzare, ti vedarà che la se giuste.

Nineta: No' butarte zo!

Frate: Ti vedarà che co' l'aiuto del Signore, e de la Madona ... Bisogna pregare, e avere fiducia nel Padre Nostro.

Gigia: Xé vero che ghe sarà una procession col vescovo?

Nineta: Mi vago a tuti i rosari, de matina e de sera.

Dorina: Halo ancora de chei santini benedii?

Checca: Ah, sì! Me ne vorave un altro perché ... quelo de prima l'ho dovèsto butare via: i gaveva ghità sora ...

Frate: Sì, ghe n'ho: ciapé! Me racomando! No' steghe dar drio a quei falsi cerùsici e ignoranti ciarlatani, e a quele driza-ossi che ve porte via i schei per niente. No' sté a farve fare robe o dire sperguri che xé tuta opera del diavolo, no' de Dio!

Gigia: Padre, però el bazegò ... lo useva anca mia pimpineta nona per stare ... megio.

Tecla: E le erbe da bèvare che vende le suore, alora?

Frate: No' su drio a parlare de erbe e fiori e fumente che uso anca mi; mi su drio a meterve in guardia de che la parcaria pagana e condannata da Santa Madre Chiesa! Come che no sappia che se 'dòpere sate le lepre, ossi de gato, piere magiche ... e cacca de cavra .... Blasfemìa! Strigarìa! Sóto, a ghe el Maligno!


Tutte [segnandosi]: Mariavergine! Gesusantissimo! Sanfelicefortunato! Madonna Santa!

Frate [a bassa voce]: E ste atente anche a quelo che ve dize i dotori ... perché ghe n'è tanti, anca massa!, che i zé atei, sensa-dio, sensa fede, materialisti! Sientifichi ... Ma dove? ma quando? se è tuto opera di un (...)




Dorina: Veiquà che i rive! Sssst.

Frate: Lupus in fabula.

Scena IV

Nineta: Amen, padre.

Frate: Dominus vobiscum!

Medico 1: Buongiorno, padre! Il Signore, però, farebbe bene ad essere anche al fianco di questi derelitti.

Medico 2: Ed anche l'Amministrazione Municipale; vi sembra questo un luogo decentemente, decorosamente, umanamente gestito e atto alla bisogna?

Eufemia: Qua ghe dago razon.

Dorina: Tazi che i se n'ha incorto finalmente!

Frate: Si fa quel che si puote; d'altronde tanti malati tutti in sì poco ... Nessuno è preparato alla bisogna.

Tecla: Però, oh, no i fa gnente.

Gigia: E cossa può?!

Medico 3: Fósse la prima volta, ma ... Capisco che sia una nuova malattia, un nuovo morbo appestante e contagioso, ma ...

Frate: Ma... ma anche la scienza si trova impreparata a maneggiarlo, se non a sconfiggerlo ...

M 1: Venendo dalla lontana India, nulla si sapeva fino a questo secolo.

M 2: Dia un po' di tempo all'indagine scientifica, e vedrà; dopotutto anche l'universo è sorto in 6 giorni!

Frate: Siamo nelle mani di Dio.

M 3: Non lo posso negare, ma, padre, mi creda, un aiuto, se pur piccolo, ma efficace, la scienza lo dà.

M 1: Sembra che Dio abbia voluto lasciare delle imperfezioni nel Creato per vedere se noi, minuscoli esseri umani, le riuscivamo a correggere, a dare una sistematina.

Nineta: Capissistu qualcossa ti?!

Dorina: Ma lassa che i se smira! Uno te cope e l'altro te sotère.

Gigia: E tutti lori i se magne i to schei.

M 2: Bem, ciò: maligno o quel che è, meglio per tutti che ci sia una adeguata pulizia e la stretta osservaza di alcune norme igieniche, visto che il morbo ìndico sembra che si propaghi e contamini per l'aria corrotta, i miasmi nauseabondi che vengono dalla sporcizia del corpo e degli ambianti! Questi scoli all'aria aperta, e la mancanza d'igiene ...

M 3: Non nego che dall'immondo provenga il male, ma è per contagio, caro collega, con-ta-gi-O, come del resto, è noto, tutte le pandemie.

M 1: Amici colleghi, non speculiamo per sillogismi; è il metodo scientifico che dev'essere opplicato, l'induzione ..., l'analisi scientifica.

Frate: Ah, voi e la vostra scienza! Non avete un accordo nemmeno sul nome da dare a questo "asiatico malore"; solo Dio (...)

M 2: "Miasma mobile" o "principio volatile": è così che lo si definisce!

M 3: Sì, ma direi piuttosto "germe mormoso", "fòmite choleroso" ... Essendo esso contagioso ...!

M 1: Che sia un "semino morbifero" o un "effluvio colerico", cari colleghi, la causa non è ancora nota, quindi per cui ci si trova ancora impreparati alla cura e prevenzione del morbo.

M 2: Igiene personale, pulizia degli ambienti, aria sana!

M 3: Ma le vesti soprattutto, in specie gli indumenti intimi. E dieta assoluta e astringenti.

M 1: Mi si diceva che clisteri con amido e laudano ..., e bagni acidi e tartaro stibiato ...

M 3: Emetico?! No, sono controproducenti! Al più vin brulè.

M 2: E il rhum, ma meglio gli infusi aromatici e vapori d'alcol.

Frate: E l'acqua benedetta, e preghiere!


M 2: Ma che l'acqua sia sempre bollita, pulita! [ i MM si dirigono ai letti - sommaria osservazione discutendo-mimando "animatamente" ]




Dorina: Ma li sentì? No i xé d'acordo gnanca fra de lori!

Gigia: Zente ch'ha studiao, ciò! Tutta ciàciara e gnente fati!

Tecla: I capisse manco de nualtre; ma, ciò, vuostu metare: i xé dotori, ciò!

Checca: E intanto chi lo ciape del bofice semo nu!

Nineta: Tasi, che no i te senta!


Eufemia: Ghe farave mi una (...) [gesto di rabbia e scherno]

Scena V

Nineta: Vardè! [barellieri dal fondo portano 2 morti verso l'uscita]




Dorina: Mariave'! E chi che i sia?

Gigia: Do poveri desgrassiai! No ti vedi: no ghe xé nessun che ghe va drio!

Nineta: Povereti.

Checca: Quando che uno nasse desgrasià, a muore desgrassià!


Frate: Requiescas in pace! Che Dio Padre Onnipotente v'accolga nel Suo Regno; et permanga semper, amen. [barellieri fermi]




Tecla: Andai i xé! La li ha puoco da benedire.

Eufemia: Tazi! E ti: coss'astu da fifolare? Li conosèvistu!?

Gigia: L'ha paura, fantolina! Anche a mi i me fa un certo che.

Dorina: A mi me fa de pi' senso 'sti qua malai.

Checca: Bià 'vere el stomego bom, bià 'vere!

Nineta: El frate, povereto, me pare che (lo abbia) ...

Tecla: Elo! E 'st'altri? Tuti scampai via!

Gigia: Distu, ciò?!

Nineta: Ma no' puole èssare, no' pule!

Tecla: Quanti ghe ne vèdistu in giro in 'sti zorni?

Eufemia: E sì: ti ha razon, ciò!

Dorina: Eh ciò! Adesso che domando mi.

Checca: Ma schèrsistu?! A te ...


Frate [terminata preghiera silenziosa]: Requescere vos, in remissionem peccatorum vestrorum, et absolvitur in nomine Patris et Filii et Spiritus Sancti, amen.

M 1 [ai portantini]: Attendete, attendete!




M 2: Son morti or ora, nevvero?

M 1: Si potrebbe ... Mortus est, non plus bulegaribus! O ...?

M 3: Ma il contagio potrebbe tuttavia sussistere ed essere operante. Gli stracci son lerci e intrisi di ...

M 2: Se non si inspira infelicemente, troppo vicini al lezzo ...


M 1: Sezioniamo? Investighiamo? [vanno con le barelle]

Scena VI

Nineta: E cossa ghe fai adeso?

Gigia: Mah!? I xé morti!!

Tecla: No savé? I li verze come galine! I ghe varde dentro.

Dorina: E percossa?

Checca: Anca mio marìo ... se ... se ... Oh, distu?

Eufemia: E eh, xé cossì che i vede ...

Nineta: E cossa vèdeli? Buole, e cossa?

Gigia: Dimme a mi!?

Dorina: Padre, cossa ghe fai?

Frate: No' stemelo a recordare! Profanare il corpo, che è opera e immagine di Dio da cui tutto viene, per ... per vèdare cossa, per indagare cossa, per scoprire ... Ah, Signore, perdona lloro che no' i vuole che sia fata la To volontà!

Checca: Ma a me senta , padre, perché el Signore ha da èssare così ... Perché mandare 'ste disgràssie poprio a quei che za trìbule de pi' in 'sta vita?! Saràla giustissia?

Gigia: Ti parli megio d'un muto, ti parli.

Frate: Saràve mègio che ti fussi muta. Zele robe da pensare? Zele robe da dire? Che testa gavèu? Dove zela la Fede? Dove zelo el timor di Dio? Dove zé ...?

Dorina: A ne capissa.

Tecla: A la scusa; a la perdone.

Checca: El Signore ... Ma percossa? Per cossa? No' capisso, padre, no' capisso!

Frate: No' ghe gnente da capire, volè capirlo sì o no!? La volontà de Dio ... E tuti 'sti pecai su 'sta tera. Sî, mi su el primo.

Eufemia: Però el colera no' a se l'ha minga gnancora ciapào ...

Frate: Perché prego, prego ma non perché el Signore me salva dal morbo, da 'sta morte stercorària, ma perché sia fata la so volontà, in çielo e in 'sta terra.

Tecla: E i altri, i altri frati, dove zeli andai? Zei morti ... za?

Dorina: Ah, xé vero: no' i se vede pi'!

Nineta: I se l'ha mocà! I dize ..., la zente ...

Frate: I xé 'ndai via; i zé andai dove che gera più bisònio de lori ... A Loreo, a Padova, a ... a Venessia. Tuto la terra zé impestà!

Gigia: E i lo ha lassà solo, qua!?

Dorina: Geri in mondo!

Frate: Lo so; molti sono i chiamati ... Zé per questo che bisogna pregare, pregare per i altri, pregare per nu; ch'el Signore ne daga forsa, ch'el Signora ne agiuda, che ...


Tecla: A zé che a va, sa'! [riferito al frate]

Eufemia: A zé che a va, che a va! Venì, done, venì! [riferito a un malato]




Checca: Mio marìo, mio marìo! Me la sentiva! Lo saveva! Sempre a mi! Tute a mi! Cossa gògiu fato mi al Signore per èssare cossì desgrasià? Cossa gogiunu fato?!

Gigia: Calmate Checca, calmate!

Frate: No' te desperare ch'el Sigore (...)

Checca: Poprio adesso che chei tre sfondroni de dotori zé 'ndà via!

Nineta: Ma zélo morto dassèno?

Dorina: A zé cossì duro e invencao.

Nineta: Che li vaga a ciamare, oh?!

Frate: Me pare ... No, no' a respire ... pi'.

Checca: Ah, santidelpurgatorio! Come farµo mi adesso? Come farò? Co' tre fantolini picoli!

Gigia: El padre qua vedarà elo cossa che a puole fare.

Tecla: No' ti zé né la prima né la .... I dovarà ben fare qualcossa, ô padre? Sinòe chi che no muore de colera, va a finire che muore de sìdio.

Nineta: Cossa femo adesso?

Eufemia: Saràve da cambiarlo; da lavarlo ...

Dorina: E distu?

Checca: E per metaghe cossa? No' me zé restà pi' gnente: ho butà via tuto, gera tuto ismerdao.

Tecla: Ti ha fato ben! No' stare a baçilare.

Frate: Me pare che i li porta via cossì, sensa fare gnente. I dize che ghe zé sempre el pericolo del contagio in tute le robe che ha tocà el ... la povera ànema.

Nineta: E come li sotèreli?

Gigia: E dove?

Dorina: Ciò, ma cossì, sporchi e onti? E sensa cassa?

Frate: Ordinanza regia, fie mie!

Nineta: E gnaca 'na messa?

Frate: No' i vuole! El contagio, el contagio ... No' i fa venire in porto gnaca i velieri che vien da fuora. Feme dare una benedia qua prima che i vegna a tiorselo.


Eufemia: Apena dito! Veiquà che i 'rive! [rientrando i portantini]

Scena VII

Checca: Ma semo sicuri ...? Che no' a sia ancora vivo?

Nineta: A me pare tanto duro!

Dorina: Varda come ch'a s'ha ingrumao.

Tecla: Zestà le coliche.

Frate: Zei andà via i dotori? Perché qua ... sarebbe da certificare el decesso de 'sto poveretto; che el Signore lo abbia in Gloria.

Checca: E dove lo portè, oh?!

Nineta: Ma, ciò! Cossì subito, sensa messa; sensa vègia; sensa ...

Dorina: Tiò, che noli, ciò! Che tempi!

Frate: Done! Cossa ògiu da dirve? Cossa ògiu da fare? L'ordine zé de soterarlo el pi' presto possibile; e dopo, dopo ghe ne muore quattro o çinque, se no' de pi', ogni zorno.

Gigia: Ma dove li sotèreli?

Nineta: Eh! Indove?


Frate [alterato]: Qua, dentro qua, su 'sta isola! Deve restare tuto qua, qua sinò el contagio, el contagio, capì, el contagio ... I li sotere qua, qua soto.




Tecla: Con un çimiterio niovo che avemo i li lasse qua!

Dorina: Ma ghe pare giusto? Gnanca le bestie!

Nineta: Mariavé! Tuti insieme, tuti misiai?!

Frate: Cossa vuolé che ve diga, le xé ordinanse règie! No' ghe xé pi' timor di Dio!

Checca: Ma mi no' vuógio! Vógio che l'abbia la so tomba, sto disgrassiao .

Dorina: Ma xelo 'po morto?

Gigia: Vara come che a s'ha ransignào!

Portantino: I devente baccalà.

Eufemia: Ma zele robe da dire?

Dorina: Senti 'sto qua! che paragoni ch'a fa!

Port: Oh, done! Fene fare el nostro lovoro! Savaremo ben nu, oh, cossa fare o no fare! E ciò che a zé morto! Andàa zé.

Nineta: Mariavergine! Vara che man!

Gigia: L'ha le òngie viola!

Dorina: E i denti neri!

Port: Done! Lassé che femo el nostro mestiere!

Checca: E cossa ghe feu adesso, oh, cossa ghe feu?

Port: E cossa vuostu che ghe femo?! Lo soterèmo.

Checca: Dove? Qua, oh?

Port: Padre, a ghe spiega elo; 'ste qua le ne fa pèrdare tempo, e pasiensa.

Eufemia: Oh, ciò!

Frate: Done, ve l'ho za dito: chi muore qua, reste qua. Cossa credè che a mi me piàza? Lasseli fare; e nualtri andemo in ciesa a pregare per l'anima de 'sto omo e che el Signore ... ne abbia tuti in gloria. 'ndemo, done.

Dorina: Sì, andemo, andemo.


Gigia: Dai, Checca, andemo: pensemo ai vivi adesso, pensemo ai vivi. [barella in fronte, frate e le 6 donne dietro, intonano (!) Miserére mei, Deus]




Frate: Exultábunt Dómino ossa humiliáta.

Scena VIII

Ope [buio nel fondo]: Ohh, benon ciò! In Comune i n'ha dito de lassare tuto cossì come che stà. La zé roba storica, ciò! Mègio cossì ... La-se-mo-li dove che i stà, lasèmoli! E mi posso anche andare a casa adesso. ' note!

Bruxelles, 13 aprile 2015.

Giancarlo Varagnolo